EUSKALTXOK

2007-12-04T23:04:00.000+01:00

EUSKARAREN NAZIOARTEKO EGUNA (Abenduaren 3an)

Aurten ere, azken urte hauetan bezala, ospatu dugu URUMEA IKASTOLA BHI-n "Euskararen Eguna".

Astelehen horretan goizeko hamaiketan EUSKARAREN ALDEKO LELOAK idazteari ekin zioten ikasleek trikitilari eta bertsolarien laguntzaz. Patata-tortila pintxoak eta freskagarriak ere jaso zituzten lan pixka bat egin ondoren. Arratsaldean TRIBIAL JOKUAZ girotu genituen gure ikasgelak eta lehia bizian ibili ondoren 2.A mailako ikasleak eta 4.mailako ikasleak (Mertxe Olasagastiren tutoretzakoak) iritsi ziren finalera.

Astearte arratsaldean jokatu zen TRIBIAL-FINALA, goian aipatutako bi taldeen artean; eta azkenik, 4. mailako ikasleak suertatu ziren garaile, baina 2. mailako ikasleek lana eman omen zieten "zaharrei".

Beraz, asteazkenean jasoko dute aipatutako 4. mailako ikasleek merezitako saria, hau da, "Kutxidazu bidea, Ixabel" filma ikustea azken bi ikastorduetan.

Zorionak irabazleei, eta baita partaide guztiei ere, oso ondo aritu baitzarete antolatutako ekintza guztietan.

Azkenik, eskerrak eman behar zaizkie egun honetan lagundu duten guztiei: euskara taldeko ikasle guztiei, irakasle laguntzaileei, bulegoko langileei... Zuen guztion lanari esker posible izan da egun honen inguruko ospakizun hauek egitea. Mila esker! ( Eta ez ahaztu!, Euskararen Eguna egun guztiek izan behar dutela, ez egun bakar bat soilik)

2007-11-15T00:20:00.000+01:00

EUSKARAREN EGUNA

Datorren hilabetean, abenduaren 3an, "Euskararen Eguna" ospatzeko asmoa dugu Ikastolan. Egitaraua prestatzeko Euskara Batzordea osatzen duten ikasleek asmo batzuk plazaratu dituzte, baina zuetako baten bati ideiaren bat bururatzen bazaio egun horretarako hemen duzue aukera iritzi sailean idatziz.

Eta gogoratu Joxe Antonio Artzek dioena:

HIZKUNTZA BAT EZ DA GALTZEN

HITZ EGITEN EZ DAKITENEK

IKASTEN EZ DUTELAKO,

DAKITENEK HITZ EGITEN

EZ DUTELAKO BAIZIK.

2007-09-24T12:55:00.000+02:00

Ongi etorri euskaltxokideok:

Hiruhilabetero izaten dugu elkarren berri lerro hauen bidez, eta zuek irailaren 21erako espero gintuzuen, baina "hiru" zenbakiarekin azken jolasa egiteko asmoarekin, hiru egun atzeratu gara komunikazio berri honetan. Beraz, barkatu eragozpenak eta ongi etorriak izan zaiteztela ikasturte berri honetara.

"Sarreratxo" hau egin ondoren, eskaera batekin gatozkizue zuek denoi, baina batez ere Urumea Ikastola BHI-ko ikasleei, hain zuzen ere.

Zer moduz iruditzen zaizue iritzien sailean jarriko bazenute zein euskal taldeen diskak nahi dituzuen erostea irratsaioetarako?

Eta bide batez zein euskal abesti nahi duzuen lantzea euskarako klaseetan?

Aurten maiz izango duzue gure berri, baina parte hartu iritzi sailean mezuak bidaliz, bestela bakarrizketa hutsa bihurtuko da atal hau. Arren!

2007-06-21T11:57:00.000+02:00

Kaixo aspaldiko euskaltxokideok:

Hiru hilabete hiru!, elkarren berri izan gabe. Gaur bete da hiruhilabeteurrena azken aldia idatzi genuela atal honetan, eta kasualitatez hiru izan dira emandako iritziak, eta hirurak animoak emanez.

Guk hiru gauza dauzkagu esateko, eta hemendik hiru hilabetera izango dugu elkarren berri, ez ahaztu! Irailaren 21ean berriro izango gaituzue indarberriturik eta ideia politekin atal hau indartzeko asmotan.

Zuen ideiak edota nahiak idatzi nahi izanez gero "Euskaltxok" atalaren inguruan, balia zaitezte iritzi sailez zuen asmoen berri emateko

Pasa ezazue uda jator eta polita, ondo pasatuz eta gutxi gastatuz.

Adiorik ez, gero arte baizik.

2007-03-21T00:02:00.000+01:00

Iepa euskaltxolkideak:

Bizi al da baten bat mundu honetan? Badirudi ezetz. Beno barkatu, badirudi bizi omen dela baten bat mundu honetan, baina inork ez duela bisitatzen gure EUSKALTXOK atala.

Zergatik ote? Agian ez da interesgarria. Agian ez du ezertarako balio. Agian ez dago ezer eskeintzeko. Agian inori ez zaio interesatzen. Agian ...

Ideia bat bururatu zaigu hor beste aldean baten bat bizi ote den jakiteko. Atal honetan, iritziren bat azaldu arte ez dugu jarraituko aurrera, eta agertuz gero, baten batek irakurtzen duen seinale, beraz, jarraituko dugu atalarekin eta berrikuntzekin. Ados?

Proposamenetako bat izan daiteke euskal musika gustukoen zerrenda osatzea, edota Urumea Ikastolak eros ditzakeen diska-zerrenda osatzea irratigintza orduetarako, edota KUTSIDAZU BIDEA, IXABEL filma erostea eta euskarako orduren batean filma hori ikustea, edota EUTSI filmarako sarrerak zozketatzea, edota ...

Ikusten duzuenez ideiak ez dira falta, baina beti batek botatzen baditu eta inork ez baditu erantzuten edo laguntzen, ba.... ideia-emaile hori aspertu egiten da. Beno, badakizue, testua irakurri, proposamenak idatzi eta erantzunak itxaron.

Agur, izan huntsa, egongo gatxik, fite artio, adiorik ez gero arte baizik.

2007-02-14T16:30:00.000+01:00

Kaixo euskaltxokideok:

Zer moduz zabiltzate?, alpertuta? Bai, noski. Hori garbi dago. Azken komunikazioa urtarrilaren hamazazpikoa izan genuen, eta harrezkero inork ez du inongo iritzirik eman han proposatutakoari. Beraz, geuk hartuko dugu lizentzia behar diren aldaketak eta proposamenak egiteko.

Lehenengo eta behin, EUSKALTXOK atala euskararen inguruan eta euskal kulturaren inguruko gunea bihurtuko da soilik, eta lehiaketaren atala beste arlo batera igaroko da.

Bigarrenik, LEHIAKETAREN TXOKOA atal berria sortuko dugu, orain arte EUSKALTXOKen barnean zegoena, baina hemendik aurrera aparte ibiliko dena.

Hirugarrenik, EUSKALTXOKen atalean goian aipatutako proposamen berri guztiak sar daitezke, baldin eta goiko helburuekin bat badatoz.

Eta azkenik, EUSKALTXOK gunearen laguntzaile edota partaide nahi izanez gero, jar zaitez harremanetan zure inguruko lagunen batekin eta harek ziur badakiela norengana jo beharko duzun. (Partaide guztiak EUSKALTXOKIDE izendapena jaso duzue, honek dakarren abantail guztiekin).

Aio eta izan untsa.

2007-01-17T19:05:00.000+01:00

PILOTA-LEHIAKETA ASMATZAILERIK GABE
Konturatuko zinetenez, aurreko pilota-lehiaketa asmatzailerik gabe gelditu zen, nahiz eta oso erraz jarri genuen asmatzeko, erantzuna adibidean baitzegoen (ja, ja, ja). Zer egingo dugu ba? Beste baterako erne ibili, eta emandako pistak jarraitu.
Beraz, eman behar genuen saria (astebeteko oporraldia Kanarian Uharteetan 4 pertsonentzat) beste lehiaketa baterako geldituko da.
Izan untsa!

2007-01-17T18:53:00.000+01:00

ZAHARRAK BERRI
Kaixo euskaltxok kideok:
Zer moduz urte berri honetan? Ba al dugu zerbait kontatzeko? Bada garaia zuek zerbait kontatzeko ezta? Beti gabiltza txoko honetatik lehiaketak direla, lehiaketak direla, edota lehiaketak direla, ideia oso orijinalak proposatzen. Zergatik ez duzue ezer berririk proposatzen txoko honetarako? Bestela badakit zer gertatuko den, EUSKALTXOK deitu beharrean, izena aldatuko diogu eta LEHIAKETAREN TXOKOA bihurtu eta kitto.
Beno, badakizue, aste beteko epea duzue ideia eta asmo berriak botatzeko EUSKALTXOK indarberritzeko, ideia eta asmo berri guztiekin bilduma bat osatuko dugu eta atal hau indarberrituta abiatuko da urtarrilaren bukaera aldetik aurrera.

2006-12-01T19:20:00.000+01:00

Kaixo euskaltxokideok:

Hemen natorkizue berriro ere, beste LEHIAKETA baten berri emateko asmoz. Oraingo honetan, kirolzaleen gustukoa izango delakoan nago, eta are gehiago pilotazaleena.

Denok dakigun bezala, datorren igandean, abenduak 17an, lau t'erdiko buruz buruko pilota txapelketaren finala jokatuko da Gasteizko Ogeta frontoian. Finalistak Martinez de Irujo batetik, eta Barriola bestetik izango dira.

Bada, asmatu behar duzuena oso erraza da, nork irabaziko duen finala eta zenbateko aldearekin irabaziko duen. Beraz, nahikoa duzue bi finalisten izena jartzea eta aldamenean zenbat "tanto" egingo duen bakoitzak.

Adibidez:

Irujok 22- Barriolak 21 (Ez ahaztu aldamenean zuen izena jartzea zozketarako)

Gogoratu azken eguna lehiaketan parte hartzeko abenduaren 17a izango dela, arratsaldeko seiak arte.

Izan untsa.

2006-12-01T19:10:00.000+01:00

Iepa euskaltxokideok:
Lehenik eta behin, zoriondu gure lehiaketan parte hartu duzuen guztioi, eta baita saiatu direnei eta ezin izan dutenei ere, baina batez ere lehiaketaren irabazle izan den OIER GARZIAri, bera izan baita elastiko polit bat eraman duen zorteduna "Kutsidazu bidea, Ixabel" filmaren protagonista AINERE TOLOSA izan zela idazteagatik. Beraz, estimatuta dago parte hartu duten guztiei eta ea animatzen zareten berriz ere hurrengoan .
Agur, baina ez adiorik.

2006-11-14T11:04:00.000+01:00

Kaixo euskaltxokideok:
Zer giza larru? Aspalditik ez gaudela elkarrekin. Beraz, ikasturte honi hasiera emateko (inoiz ez da berandu), lehiaketa bat antolatuko dugu motorrak berotzeko. Gaia?, oso erraza! "Kutsidazu bidea, Ixabel".
Gehienok irakurri dugu liburua edo ikusi antzerkia edota filma. Bada, lehiaketaren galdera horrekin izango du lotura. Denok dakigu, liburuaren idazlea Joxean Sagastizabal dela; beraz, ez dugu jarriko hain galdera erraza.
Honako hau da galdera: NOR DA IXABEL PROTAGONISTAREN AKTOREAREN IZENA ERREALITATEAN?
Asmatzaileen artean kamixeta eder eta polit bat zozketatuko da.
(Gogoratu aktorearen izenaren ondoren, zure izen-abizenak idaztea.)
Erantzunak jasotzeko epea azaroaren 30ean bukatuko da.

Beno lagunok, erantzunen zain gauzkazue. Izan untsa eta egongo gatxik/n.

2006-06-12T13:38:00.000+02:00

Ikusita aurreko kirol lehiaketak ez zuela izan arrakasta handirik, nahiz eta irabazle bat izan zen, ikasturte honetato bigarren eta azken lehiaketa jarriko dugu martxan.
Honako hau, euskal hizkuntzaren inguruan joango da, eta asmatzeko galdera hauxe izango da:

Zein da euskal hitz bakarra bi bokal berdinen artean h-hizkia ez daramana?

Erantzunak bidaltzerakoan, idatzi erantzuna letra larriz (handiz) eta erantzulearen izena. Adibidez:

MAATS (Joxe Arriaran)

2006-06-01T12:29:00.000+02:00

Aupa lagunok, blog honi hasiera emateko hona hemen bi albiste:

1.- Urumea Ikastolako Bertso Taldeko pelota txapelketan honako emaitza hau izan zen:

Jon-Xabier-Mikel.M 22- Xabi-Julen 21
Zorionak irabazleei eta animo galtzaileei.

2.- Pelota partidak direla eta, orri honen bidez "porra" bat irekiko da datorren igandeko buruz buruko eskuzko finalaren emaitza asmatzeko. Gogoratzen dizuet finala Aimar Olaizolak eta Martinez de Irujok jokatuko dutela. Sari handiak banatuko dira emaitza asmatzen dutenentzat: asteburuak Marina D´Or-en, bidaiak Port Abenturara, kamisetak, karpetak, ...

Hona hemen nire emaitza adibide bezala:
Olaizolak 22- Irujok 10

Ikasturte Bukaerako Jaialdia dela eta, badoa deialdi bat ikasle guztientzat.

Azken urteotan, mus txapelketan beti bikote bera gelditzen da txapeldun gisa (Mikel Zugasti eta Mikel Mendizabal). Adinean aurrean doaz eta, prest daude beraien txapela beste batzuen buruan uzteko, baina horretarako baldintza bakarra izango da, mahaiaren aurrean irabaztea, eta azken urteetan ikusi denez, ez da batere erraza izan.

Lerro hauetatik deialdi berezia egiten zaizue ikasle guztioi, anima zaitezten bikote horri txapela kentzen behar den bezala, hau da, irabaziz. (Aurten 4. mailan dauden ikasle batzuk berriro ere saiatuko direla espero dugu, iaz oso gertu ibili baitziren garaipenetik)